Në një aksion si në filma, i riu me banim në Karbunarë, Lushnjë mundi t’i arratisej forcave ët policisë dhe FNSH-së së Fierit me makinën e tij tip “BMW” e blinduar pasi udhëtonte me vete me një armë zjarri tip “Grand Power” Q 100 me një fishek në folenë e armës dhe një krehër me 15 fishekë.
Forcat e Policisë u vunë në ndekje të tij dhe për këtë u kërkuan edhe përforcime.
Në tentativë për t’i shpëtuar kapjes, 37-vjeçari braktisi makinën e blinduar ,nisi të vraponte në këmbë dhe hodhi disa metra larg automjetit armën e zjarrit.
Ai nuk mundi të shkonte larg në këmbë pasi u arrestua në rrugicat e qytetit pas ndërhyrjes së forcave të shtuara të policisë.
I njohur ndryshe edhe me pseudonimin “Juli i Pashakos”, ai nuk ka pranuar të flasë, por ka deklaruar se udhëtonte i armatosur për vetëmbrojtje.
Ndaj tij do të rendojnë akuzat “Prodhimi dhe shitja pa leje e armëve dhe municionit luftarak” dhe “Mosbindje e punonjësit të policisë së rendit publik”.
Kush është “Juli i Pashakos”?
Julian Sulo është një biznesmen i ri, emër i njohur për policinë. Ai ka në pronësi një lokal dhe një lavazh në qytetin e Lushnjës.
Ndaj 37-vjeçarit është organizuar disa kohë më parë një atentat, ku Sulon e sulmuan me sende të forta, por kjo ngjarje nuk u zbardh kurrë dhe autorët nuk u identifikuan.
Ai njihet si rivali i kreut të bandës së Lushnjes Aldo Bares.
Pseudonimi i tij është “Juli i Pashakos” dhe u shoqërua si person i dyshuar në masakrën e ndodhur në tetor të vitit të kaluar në Lushnje ku mbetën të vrarë në një atentat dy miq të nipit të Aldo Bares.
Sulo u la më pas i lirë për mungesë provash.
Më 11 qershor 2016, ai mbeti i plagosur në një pikë bastesh pas ndeshjes Shqipëri-Zvicër, nga Arjan Aliço anëtar i bandës së Aldo Bares, i njohur si “Arti i Braçes”.
Ky i fundit është dënuar dhe më parë si bashkëpunëtor në vrasje.
NJOFTIMI I POLICISË:
Nuk i bindet urdhrit të punonjësit të policisë për të ndaluar pasi qarkullonte me armë zjarri në automjet, policia e Lushnjes në bashkëpunim me FNSH Fier arrestojnë në flagrancë autorin.
Sekuestrohet arma e zjarrit tip “Grand Power” dhe një krëhër me 15 fishekë.
Specialistët për Hetimin e Krimeve në Komisariatin e Policisë Lushnje në vijim të kontrolleve të ushtruara me qëllim mbajtjen nën kontroll të situatës kriminale dhe rritjen e sigurisë së qytetarëve, arrestuan në flagrancë shtetasin:
-Julian Sulo, 37 vjeç, banues në Karbunarë, Lushnje.
Gjatë kontrollit të ushtruar nga policia në lagjen “Gafur Muço”, shtetasi Julian Sulo duke udhëtuar me mjetin tip B.M.V të blinduar, nuk i është bindur urdhrit të punonjësve të policisë për të ndaluar.
Policia iu vu në ndjekje shtetasit të lartëpërmendur i cili pasi braktis makinën, hedh armën që mbante në mjet dhe largohet me vrap në rrugicat e qytetit.
Falë veprimeve të shpejta të policisë së Lushnjes dhe FNSH Fier, u bë e mundur kapja e këtij shtetasi në lagjen “18 Tetori”, Lushnje.
Në afërsi të mjetit është gjetur një pistoletë tip “Grand Power” Q 100, një krëhër me 15 fishekë dhe një fishek në folen e fishekut, të cilat u sekuestruan në cilësinë e provës materiale.
Materialet i kaluan Prokurorisë pranë Gjykatës së Shkallës së Parë Lushnje për veprat penale “Prodhimi dhe shitja pa leje e armëve dhe municionit luftarak” dhe “Mosbindje e punonjësit të policisë së rendit publik” parashikuar nga nenet 278 dhe 242 të Kodit Penal./joq
